លោក ញឹក ប៊ុនឆៃ ថ្លែងក្នុងសន្និសីទកាសែត កាលពីម្សិលមិញ។
ភ្នំពេញ: គណបក្ស ហ៊្វុនស៊ិនប៉ិច ដែលទើបបង្រួបបង្រួមគ្នាសារជាថ្មីជាមួយនឹងការយាងមកធ្វើជាព្រះប្រធានរបស់ សម្តេចក្រុមព្រះ នរោត្តម រណឫទ្ធិនោះ កាលពីម្សិលមិញលោក ញឹក ប៊ុនឆៃ អនុប្រធានទី២ នៃគណបក្សរាជានិយមមួយនេះ បានព្រមានថា ហ៊្វុនស៊ិនប៉ិច អាចនឹងត្រូវបែកបាក់គ្នាជាថ្មី ប្រសិនបើជម្លោះផ្ទៃក្នុងបក្ស មិនត្រូវបានដោះស្រាយនោះទេ។
ថ្លែងក្នុងសន្និសីទកាសែតកាលពីរសៀលថ្ងៃសុក្រ លោក ញឹក ប៊ុនឆៃ បាននិយាយរិះគន់ចំៗ ចំពោះទង្វើនិង សកម្មភាពរបស់ព្រះអង្គម្ចាស់ នរោត្តម រណឫទ្ធិ ដែលបានសម្រេចអ្វី មិនឆ្លងកាត់ អនុប្រធានទី១ និងទី២ នៃ គណបក្ស និងថ្នាក់ដឹកនាំបក្សដទៃទៀត ព្រមទាំងបានប្រកាសប្រឆាំងដាច់អហង្កការ ជាមួយសម្តេចក្រុមព្រះ មិនឲ្យមានការប្តូររូបសញ្ញាគណបក្ស និងការរំលាយគណៈកម្មការនាយក គណៈកម្មាធិការអចិន្ត្រៃយ៍ និងរំលាយសមាសភាពថ្នាក់ដឹកនាំមូលដ្ឋាននោះឡើយ។
លោក ញឹក ប៊ុន ឆៃ បានមានប្រសាសន៍ថា «ខ្ញុំមិនគំាទ្រសម្តេចក្រុមព្រះក្នុងការ ប្តូររូបសញ្ញារបស់គណបក្ស និងការរំលាយគណៈកម្មការនាយក និង គណៈកម្មាធិការអចិន្ត្រៃយ៍របស់គណបក្សហ្វ៊ុនស៊ិនប៉ិចចាស់ និងដាក់បញ្ចូលនូវសមាជិកថ្មី ដែលជាមនុស្សរបស់ព្រះអង្គនិងជាគណៈកម្មការនាយករបស់ គណបក្ស សង្គមរាស្ត្ររាជាធិបតេយ្យនោះទេ»។
លោកបានបន្តថា៖ «ខ្ងុំមិនចង់ឃើញរាជវង្ស វាយប្រហារគ្នានោះទេ ហើយដែលមានបក្សមួយដឹកនាំ ដោយសម្តេចក្រុមព្រះ បក្សមួយដឹកនាំដោយ សម្តេចព្រះអនុជរាជបុត្រី ព្រះអង្គជារាជវង្ស ដែលជាបុត្រព្រះករុណាដូចគ្នា ហើយមកវាយប្រហារគ្នានោះ។ ខ្ញុំវាអត់ចង់ឃើញ ខ្ញុំជាអ្នករាជានិយម........។ បើយើងមានការរួបរួមគ្នាគឺយើងរស់ បើគ្មានទេគឺយើងស្លាប់ ។ ហើយខ្ញុំ ក៏មិនមានគំនិត ដើរចេញពីគណបក្សនេះផងដែរ អ្វីៗគ្រប់យ៉ាងដែលខ្ញុំចង់បាននោះ គឺការបង្រួបបង្រួម ដើម្បីទាញសំឡេង រាជានិយម និងអ្នកសីហនុនិយមមកវិញ។ តែយ៉ាងណាក៏ចំពោះ គោលបំណង របស់សម្តេច ក្រុមព្រះនរោត្តម រណ ឫទ្ធិ ដែលចងផ្លាស់ប្តូរ ឡូហ្គោ (Logo) ( ស្លាក)របស់គណបក្ស និងការរំលាយគណៈកម្មការនាយក និង គណៈកម្មាធិការអចិន្ត្រៃយ៍របស់គណបក្សហ្វ៊ុនស៊ិនប៉ិចចាស់ចោលនោះ ខ្ញុំ និងមន្រ្តីមូលដ្ឋានមិនព្រមនោះឡើយ»។
ទោះយ៉ាងណាក៏ដោយ លោក ញឹក ប៊ុនឆៃ បានបញ្ជាក់ថា លោកមិនមានគម្រោងធ្វើរដ្ឋប្រហារទម្លាក់សម្តេចក្រុមព្រះនោះទេ។ គោលបំណងរបស់លោកគឺ លោកចង់ឲ្យមានការបង្រូបបង្រួមគ្នា ជាធ្លុងមួយ ដើម្បីប្រមូលរាជានិយម និងអ្នកសីហនុនិយមមកវិញ និងដើម្បីការពាររាជវង្សានុវង្សតែប៉ុណ្ណោះ។
នៅពេលសួរថា តើលោកនឹងចូលជាមួយគណបក្សប្រជាជនកម្ពុជាឬទេ ប្រសិនបើសម្តេចក្រុមព្រះមិនអាចបង្រួបបង្រួម និងដឹកនាំគណបក្សហ្វ៊ុនស៊ិនប៉ិច បាននោះ ហើយគណបក្សហ្វ៊ុនស៊ិនប៉ិច នឹងត្រូវបានបែកបាក់ជាថ្មីទៀតនោះ? លោកញឹក ប៊ុនឆៃ បានមានប្រសាសន៍ថា «ខ្ញុំមិនចូលជាមួយគណបក្សប្រជាជនកម្ពុជានោះទេ។ ហើយគណបក្សប្រឆាំង ក៏ខ្ញុំមិនចូលនោះដែរ ពីព្រោះ មេដឹកនាំ គណបក្សប្រឆាំងទាំងនោះ ខ្ញុំស្គាល់ច្បាស់ណាស់។ ដូច្នេះ ខ្ញុំមិនទៅណាចោលគណបក្សហ្វ៊ុនស៊ិនប៉ិចនោះទេ។ ខ្ញុំនៅក្នុងគណបក្សហ្វ៊ុនស៊ិនប៉ិច»។
ទាក់ទងនឹងការលើកឡើងរបស់លោក ញឹក ប៊ុនឆៃ ខាងលើនេះ លោក ញេប ប៊ុនឈិន ជំនួយការផ្ទាល់របស់សម្តេចក្រុមព្រះ នរោត្តម រណឫទ្ធិ និងជាអ្នកនាំពាក្យនៃ គណបក្សហ្វ៊ុនស៊ិនប៉ិច បានច្រានចោលទាំងស្រុង ចំពោះការលើកឡើងរបស់លោកញឹក ប៊ុនឆៃ និង មានប្រសាសន៍យ៉ាងខ្លីថា៖ «អ្នកដែលមិនប្រជាធិបតេយ្យនោះ គឺលោក ញឹក ប៊ុនឆៃនេះឯង»។
លោក ញេប ប៊ុនឈិន បានបន្ថែមថា រហូតមកទល់ពេលនេះសម្តេចក្រុមព្រះ ក្នុងនាម ព្រះអង្គជាព្រះប្រធាននៃគណបក្សហ្វ៊ុនស៊ិនប៉ិច ពុំបានរំលាយគណៈកម្មការនាយក និងគណៈកម្មាធិការអចិន្ត្រៃយ៍របស់គណបក្សហ្វ៊ុនស៊ិនប៉ិចចាស់ចោលនោះទេ។ ក៏ប៉ុន្តែ ព្រះអង្គ បានបង្កើតគណកម្មការមួយ ដើម្បីធ្វើការពិនិត្យ និងកែសម្រួលរចនាសម្ព័ន្ធបក្សឡើងវិញ ដើម្បីឲ្យស្របទៅនឹងសេចក្តីត្រូវការ និងគោលនយោបាយគណបក្ស ព្រមទាំងបានបង្កើតលក្ខន្តិកៈថ្មីមួយ សម្រាប់ដាក់បញ្ចូលទៅក្នុងអង្គសមាជវិសាមញ្ញរបស់គណបក្ស ដែលគ្រោងនឹងប្រព្រឹត្តនៅពេលឆាប់ៗខាងមុខនេះ។
មន្ត្រីជាន់ខ្ពស់នៃ គណបក្សហ្វ៊ុនស៊ិនប៉ិច មួយរូបដែលសុំមិនឲ្យប្រើឈ្មោះ បាននិយាយថា នៅពេលថ្មីៗនេះ សម្តេចក្រុមព្រះនរោត្តម រណឫទ្ធិ បានប្រកាសរំលាយ គណៈកម្មាធិការអចិន្ត្រៃយ៍ ចំនួន ២៣រូប និង គណៈកម្មការនាយក ២៥៣រូបនិងបានរៀបចំឡើងវិញត្រឹមតែចំនួន ២៧រូបដែលសុទ្ធជាមនុស្សថ្មីទាំងអស់ និងមិនបានដាក់សមាជិកចាស់ ចូលវិញទេ ព្រមទាំងបានរៀបចំរចនាសម្ព័ន្ធ ថ្នាក់មូលដ្ឋានថ្មីទាំងអស់ផងដែរ ។ មិនតែប៉ុណ្ណោះ ព្រអង្គបានបញ្ជាឲ្យទម្លាក់ស្លាកគណបក្ស ហ្វ៊ុនស៊ិនប៉ិចចាស់នោះចុះទាំងអស់ ហើយរង់ចាំលើកស្លាកគណបក្សថ្មី ដែលជាហេតុធ្វើឲ្យមន្រ្តីគណបក្សហ៊្វុនស៊ិនប៉ិចចាស់ៗមួយចំនួនដែលមិនមានឈ្មោះនោះ នាំគ្នាតវ៉ាទៅលោកញឹក ប៊ុនឆៃ។
លោក ញឹក ប៊ុនឆៃ អាចនឹងជួបពិភាក្សាជាមួយសម្តេចក្រុមព្រះនរោត្តម រណឫទ្ធិ នៅថ្ងៃសៅរ៍នេះ ដើម្បីដោះស្រាយជម្លោះផ្ទៃក្នុងបក្ស។
No comments:
Post a Comment